Tanzania plane crash
Salamu ninazitoa, kwa ndugu watanzania,
Machungu twayapitia, kilio metufikia,
Ajali lotufikia, ni Bukoba-Tanzania,
Poleni watanzania, kwa hi’ ajali ya ndege.
Hatuwezi kutabiri, ajali kinga haina,
Kwa vyombo vya usafiri, inakuja kiaina,
Kwenye ndege hata feri, magari pia safina,
Sisi ndugu wasafiri, tuzidi kuombeana.
Twayathamini maisha, hilo hakika mwandani,
Tena pasipo kubisha, tuna kilio cha ndani,
Ajali ndugu yatisha, yatutoa duniani,
Tuwaombee wenzetu, wale walotangulia.
Tuwafariji wafiwa, wababa pia wamama,
Na watoto walofiwa, lazima kuwatazama,
Wazidi kunyunyuziwa, sizo mipaka neema,
Poleni sana wapendwa, tulie kwa tumaini.
Tumshukuru Rabuka, loruhusu yatokee,
Na walionusurika, nazo nguvu awatie,
Ili wapone hakika, waje wamshuhudie,
Ewe Mungu Maulana, zishushe zako baraka.
Ajali si masihara, ila mimi nafikiri,
Tuzidi kuwa imara, kuepuka yalojiri,
Yasitoke’ kila mara, kwa vyombo vya usafiri,
Kwani hii ni hasara, ajali zikikithiri.
Na wapendwa marubani, sisi tunawaamini,
Mliketi masomoni, kutuendesha angani,
Hii ajali kazini, s’sa mwongeze umakini,
Muwe na moyo mkuu, msije nyuma kurudi.
Chonde simameni wima, ombi langu mlishike,
Muutunze usalama, tusafiripo tufike,
Tushikamane daima, na elimu itumike,
Mengine tumwache Mungu, ayatenda kwa ziada.
Naomba niwaageni, chozi linanizidia,
Poleni sana poleni, wandugu watanzania,
Huu sasa mtihani, ila tuziweke nia,
Ni mimi Stani malenga, mtoto wa Usangira.
Stanislaus Stephan Usangira
+255714325876/+255694091955
Tabora-Tanzania.
Similar Posts by The Mt Kenya Times:
- Standard Group defends editorial independence after President Ruto’s criticism
- Tharaka-Nithi set to get permanent county headquarters, 13 years after devolution
- MKU’s global technology award winning teams caution youth on misuse of Artificial Intelligence
- MKU partners with Principals to promote mediation in schools
- Dagne Walle: The Ethiopian Maestro Redefining African Music
About the Author
